NUUT

Die Benoemingsvorm gee aan die versekeraar (Sanlam) die opdrag aan wie die lewensversekering betaal moet word. Volgens die versekeringswet moet die versekeraar (Sanlam in die geval van die Predikante Pensioenfonds se lede) streng by die benoemingsvorm bly. Sanlam vereis dus ’n spesifieke benoemingsvorm ten opsigte van die risikovoordele (lewensversekering). ‘n Nuwe vorm is op 1 September 2025 voorsien. Alle lede moet hierdie vorm voltooi en aan die pensioenfondskantoor besorg. Klik op die rooi banier om die vorm oop te maak of af te laai.

2025 se Nuusbrief

Die Fonds se jongste nuusbrief kan hier afgelaai word: Nuusbrief 2025.
Hierdie nuusbrief bevat inligting oor ’n verskeidenheid sake soos die Fonds se prestasie, die lewensfasebeleggingsmodelle, die tweepotstelsel by bedanking of emigrasie, die omsetting- en voortsettingsopsie, sterftevoordele, die pensioenfondskantoor se verhuising en ’n lekkerlees artikel deur Paul Hutchinson, Verkoopsbestuurder van Ninety One.

Aftrede-seminare

Alexforbes bied jaarliks aftrede-seminare vir lede wat beplan om binne die volgende vyf jaar af te tree. Die aftrede-seminare word van 16 September 2025 tot 11 Oktober 2025 in al die groter stede gehou:
Wes-Kaap: George (16 Sep), Kaapstad (27 en 30 Sep) en Stellenbosch (2 Okt).
Vrystaat: Bloemfontein (18 Sep).
KwaZulu-Natal: Durban (30 Sep, 3 Okt en 4 Okt), Pietermaritzburg (1 Okt) en Richardsbaai (2 Okt)
Oos-Kaap: Gqeberha /Port Elizabeth (9 Okt en 11 Okt) en Oos-Londen (18 Sep).
Noordelike provinsies: Johannesburg (17 Sep, 20 Sept, 2 Okt en 4 Okt) en Pretoria (18 Sep, 20 Sep, 27 Sep en 2 Okt).

Klik hieronder op “Click here to register”. Dit neem jou na Alexforbes se bespekingsblad. Kies dan die plek waar jy ’n aftrede-seminaar wil bywoon. By sommige plekke word meer as een aftrede-seminaar aangebied. Klik op “Confirm my attendance”. ’n Vormpie sal dan verskyn waarop jy die keuse kan uitoefen vir watter sessie jy wil registreer. Vul dan jou besonderhede in en klik op “Confirm”.

Aktiewe lede – Omsendbrief vir die 2026 finansiële jaar

1 Maart 2025 tot 28 Februarie 2026: Omsendbrief vir 2026
Vorm vir opsionele lewensdekking vanaf 1 Maart 2025: Sterftedekking

Tweepotstelsel

Die tweepotstelsel het op 1 September 2024 in werking getree.
(1) Lees in die Fonds se nuusbrief van 2024 in gewone Afrikaans wat die tweepotstelsel is en hoekom lede liefs nie nou onttrekkings moet maak nie: Nuusbrief 2024
(2) Lede wat wel ’n onttrekking wil doen, moet die eis verkieslik via AF Connect doen.
(3) Skakel na Alexander Forbes se webblad met omvattende inligting oor die tweepotstelsel: Tweepot webwerf

Beskermingsdiens

Lede wat aftree en besluit om ’n eksterne annuïteitsproduk aan te koop, is soms onseker of hulle die regte besluit neem. Alexander Forbes bied nou ’n beskermingsdiens aan lede van die Predikante Pensioenfonds om objektief na die spesifieke produk en die koste daarvan te kyk. Die lid kan die voorstel, soos dit aan die lid voorgelê is, aan Alexander Forbes stuur. Teen ’n koste van R1 000 plus BTW (dit wil sê R1 150,00) sal Alexander Forbes die voorstel objektief beoordeel en aan die lid verslag doen. Kontak die hoofbeampte [Kontakbesonderhede] vir besonderhede oor hoe om die diens aan te vra.

Beleggingskeuse

Lede van die PPF het ’n keuse (wat hulle enige tyd skriftelik kan wysig) oor hoe hulle bestaande fondswaarde en hulle maandelikse bydraes tot die pensioenfonds belê moet word. Die keuse bestaan uit die kies van ’n model. Om die modelle te verstaan, behoort die lid kennis te neem van die verskillende portefeuljes en die verskillende bateklasse in hierdie portefeuljes. Lees die nuwe inligtingsdokument (September 2023) wat die PPF se opsies, portefeuljes en bateklasse verduidelik: Beleggingskeuses
Beleggingskeusevorm: Vorm

ALGEMEEN

Die Predikante Pensioenfonds van die Ned. Geref. Kerk in Suid-Afrika (PPF) is die pensioenfonds vir predikante van die NG Kerk in Suid-Afrika (Wes-Kaapland), die NG Kerk in Noord-Kaapland, die NG Kerk in Oos-Kaapland, die NG Kerk in KwaZulu-Natal en vanaf 1 September 2021 ook die NG Kerk in die Vrystaat. By implikasie beteken dit dat al die gemeentes in die betrokke sinodes deelhebbers van die PPF is.

Die PPF het op 1 Januarie 2008 vanaf ’n vaste voordeel struktuur na ’n vaste bydrae struktuur omgeskakel.

Die PPF se aktiewe lede het op 30 April 2025 op 556 lede gestaan. Daar was toe ook 209 pensioentrekkers en 123 IFLA-lede (In-fonds Lewende Annuïteit). Die nuutste syfers kan telkens in die jongste Trusteeverslag gelees word.